КЫРГЫЗ РЕСПУБЛИКАСЫНЫН УЛУТТУК ТАРЫХ МУЗЕЙИНДЕ ДҮЙНѲЛҮК БАНКТТЫН АТКАРУУЧУ ДИРЕКТОРЛОРУНУН ДЕЛЕГАЦИЯСЫ КЕЛДИ

Дүйнѳлүк банктын Вашингтондогу Доминик Фавр башында турган Аткаруучу директорлору, Кыргызстандын Президенти жана Аткаруу бийлиги менен сүйлѳшүү жүргүзгѳн маанилүү иш сапарынын алкагында, ѳлкѳнүн жүзү саналган тарых музейине саякат жасады.
Жогорку даражалуу делегацияны, музей директору, профессор Жылдыз Бакашова тосуп алып, алгач эркин форматта кыскача пикирлешип жана эстелик сүрѳткѳ түшүштү.
Атайын ѳтүнүп келген меймандарга, эркин жана Эгемендүү Кыргызстандын тарыхы, мамлекеттүүлүгү, маанилүү окуялары, символдору жана уникалдуу коллекциялары тууралуу кызыктуу экскурсия жүргүзүлдү.
Ар ѳңүттѳ кызыккан суроолорун берген жана адамзаттын руханий мурастарынын тизмесине кирип, шедеврлердин катарын толуктаган экспозиция менен таанышкан делегация ѳкүлдѳрү, соңунда ѳтѳ суктануусун жана ыраазычылыгын билдиришти.